1. No category

BIOGRAFIA:
Anselmus (Boy) Dap
Fecha di nasementu: 25 òktober 1933
Boy Dap te dia di awe ta e úniko kantante –kompositor ku a presta pa gana e festival di Tumba
di Kòrsou na 10 okashon, ku respektivamente tumbanan: "Bashé" (1971), "Dal e Kos" (1973),
"Mand’é" (1974), "Sigui Awor" (1979), "Tur hende kompañ’é" (1981), "Un biaha mas" (1983),
"Despensa, e ta bini" (1985), "Waya pasa bai" (1989), emperador di tumba di Antia (1989),
‘Bolt’é blachi’ (1992) i ‘Klab’é’ (1997). Serka un otro kantante e kos aki lo ta straño, pero no
pa Boy Dap.
Serka kompositornan Antiano, bo ta mira un sierto amor, preferensia, pa un género di músika.
Un ta preferá wals di Kòrsou, otro ta gusta dansa òf mazurka, ets. Boy Dap tin abilidat den
komponé tumba. Despues di e genio de Palm, Boy Dap ta esun ku tin mas tumba riba su
nòmber. Hopi di su fanátikonan ta haña e tumba "E Djaka" e mihó komposishon den e ritmo di
tumba ku e la yega di traha. Esaki ta e tumba ku kua el a kuminsá eksperimentá riba tereno di
tumba. Na diferente okashon e la realmente eksperimentá ku nos ritmo di tumba, kaminda e la
desaroyá nos ritmo di tumba i a hinka otro ritmo den esun di tumba.
Asina el a komponé algun tumba, ku pa regla mester a haña otro denominashon i no tumba,
manera entre otro ; tumbanan pregoná "E Djaka" i "Ta bo morto bo ke", tumbanan di karnaval
(nos road-march), tumba seú "Dal e kos" i e tumba kalipso "Bash’é, "Mand’é" i "Basilon".
Tambe Boy a komponé "tumba guaracha" i "tumba pachanga'" . Boy Dap a skor tambe komo
kompositor di wals. Su tres bunita wals nan: "Amor skondí", "Barika gel" i "Amor sin doló" ku
tekstonan sentimental ku a bira hopi konosí.
Na edat di 4 aña Boy a kuminsá sinti vibrashon di muzik rònt di dje. E tabata biba e tempu ei
den Panamaweg banda di “Sanatorio Krus Bèrdè” den Otrobanda i e la sera konosí ku
bandanan di jazz ku ta bin na kas di su tata bin ensayá, manera: "Bright Star Band" i "Merry
Music Makers". Boy su tata tabata toka saksofon den e banda ei i tambe 4 otro tipo di
instrumènt, flùit, klarinèt, piano i drùm. Esaki den e tempu ei tabata normal i ta indikashon kla
dikon Boy ta un artista/ músiko multifasetiko, músika ta den su venanan.
Na edat di 8 aña Boy ya tabata “tover” riba instrumèntnan di su tata i manera ta di spera, de bes
en kuando ta kibra algun di e instrumèntnan i klaro ku esaki ta tin konsekuensia p’e. Tambe
tabata sosodé ku durante di ensaño ora ku e drùmer no presentá, Boy mes ta kai aden pa ensayo
por kontinuá. E tempu ei ya e tabata tin e “swing” pa por a yuda kurpa i wanta ritmo.
Den e mesun temporada aki, Boy Dap a kuminsá kanta den koro di misa di Pietermaai i ku e
kor "Zingende Jeugd" bou di guia di frater Arnoud i frater Fidelius.
Ku "Zingende Jeugd" e hóben Boy Dap a aktuá diferente biaha, entre otro na e promé
transmishonnan di Curom, den diferente misa na Kòrsou, den teater Roxy i teater Brion.
Miéntras tantu, Boy huntu ku dos otro ruman ku instrumèntnan di nan tata, nan a forma un trio
di kas. Boy tabata toka klarinèt i su dos otro rumannan tabata toka piano i drùm. Ya pa e
temporada aki, Boy su amor pa muzik a krese enormemente i e tabata bai Plaza Juliana pa
skucha momentu ku tabatin fiesta den Klup Curaçao. E tabata skucha bandanan popular manera
banda di Juan Rosales, Tata Leonard i bandanan internashonal ku ta bin di entre otro Puerto
Rico.
Na edat di 14 aña Boy a skucha e orkesta di Estrellas del Caribe toka e piesa “United Cafe” i e
1
piesa aki a hasi un tremendo impreshon riba e hóben. Ei tambe ta momento ku a nanse e idea
serka Boy pa bira músiko. Ku su amigu Nolly Felida el a kuminsá siña toka kitara.
Despues el a kuminsá ensayá ku e banda Happy Boys. E orkesta aki tabata dirigí pa Virgilio
Francinet tabata tin entre otro Jose Casseres komo kantante/kitarista.
Boy Dap a debutá komo kantante den e banda "Estrellas Curazao" di Emilio Escobar ku e piesa
"Otra Vez". Esaki a sosodé riba 2 di desèmber 1952. Despues di 3 aña den e banda aki Boy a
sigui su kaminda musikal, danki na yudansa di Juan Camelia i Gabichi Martis, e la logra a
forma e banda "Lírico Antillano".
Ta hustamente e temporada aki tabata e temporada ku a kuminsá graba disko, i huntu ku Nolly
Felida, pianista, Fred Gay, bahista, Augusto Boelijn, Carlos Martinez,Juan Camelia,
kantantenan Erquimides Candelaria i Agusto Gressman, saksofonistanan Chito Borgschot i
Guillermo Pietersz, Boy Dap a graba diferente disko.
Boy tabata fungi tambe komo kantante invitá serka konhunto "Tipico Moderno" i "Happy
Boys". Tata Leonard, ku tabata un bon saksofonista i areglista tabata dirigí e orkesta.
Boy su promé grabashon tabata ku "Happy Boys" ku e titulo "Palu frio". Den orkesta "Happy
Boys" Boy tabata toka bongo, tumbadora i drùm miéntras ku e tabata e kantante estelar di e
orkesta. Ku “Happy Boys" Boy Dap a keda basta tempu, te ora un kandela a kima kas di Nolly
Felida i asina tambe tur instrumèntnan di e banda.
Pa perfekshoná su mes mas ainda den musika, Boy a sigui un kurso pa mehorá su bos. Kurso
"La Voz Perfecta". E temporada ei Boy tabata kanta ku Konhunto "Lluvia Musical". Despues di
4 aña, Boy a pasa pa forma parti di e konosido orkesta "EstreIlas del Caribe" bou di direkshon
musikal di e gran trompetista, Edgar Supriano.
Den "Estrellas del Caribe" el a komponé ; "Ai no chansa", "Sota di Bulpes", "Hink'e aden saka
nobo", "Baha fo’i mi lomba", "Pachanga del año nuevo" i "B' a subi".
Nos mester hasi menshon ku e kansion “Ai no chansa”, kual e proyekto bunita di Fundashon
Bon Intenshon i MCB aki ta hiba su nomber, tabata tambe un di e hitnan grandi di Boy.
Boso ta kòrda kon e ta bisa e jufrou : bisa bo nomber, bisa mi unda bo ta biba, bisa bo number
di telefon........i e jufrou a kontest’e “Ai no chansa”.
Despues di esaki a sigui e diferente kontraktnan pa eksterior: Sürnam, Jamaica, Costa Rica,
"Carifesta", un show di karnaval na Rotterdam.
Boy tabata hasi su presentashonnan regularmente den hotèlnan lokal.
Boy Dap tabata e promé kantante Antiano pa graba un disko LP (long play) i a graba ku
diferente banda mas, entre otro: "Six dimensions", "Heart "Breakers", "Aristo Combo",
"Herman Wegewijs ", "Trio Renaud", "Willy Pérez y su orquesta", "International Combo",
"Morón Combo", "Zoyoyo y su grupo", "EstreIlas del Caribe", “Explosion Latina” i “Piña
Colada”.
Pa loke ta trata Festival di Tumba, Boy Dap a partisipá na 22 okashon, ganando e korona na 10
okashon manera a keda indiká.
Boy a partisipá na 5 okashon ku Estrellas del Caribe, na 5 okashon ku Explosion Latina, na
kuater okashon ku Arnell i Orkesta, 2 biaha ku Gibi i Orkesta i 1 biaha ku Piña Colada, Grupo
Oko, Gibi i Explosivos, ERA, Eclipse i Gio Fuertisimo.
2